Antoine DE SAINT-EXUPÉRY /aⁿ-toan de seⁿ-tek-zuperi/ (1900-1944), sī Franse
(Hoat-kok) lâng, sè-kài ū-miâ ê hui-hêng-ka kah chok-ka. I chhut-sì tī Lyon,
12-hòe tē-it pái chē hui-hêng-ki, choǎn tùi hui-hêng-ki ê chhù-bī bô thêng. 21-23 hòe
chò-peng liáu, i ho̍k-bū tī hâng-khong iû-piān, hui-hêng Europa kah Lâm-Amerika
tiong-kan ê hâng-sòaⁿ. Āu-lâi, i tńg Franse chò chhì-poe-oân, ti̍t-kàu 2-chhù
sè-kài tāi-chiàn. 1939-1940 i koh ka-ji̍p kun-tūi, tam-jīm hui-hêng-oân.
Tī Franse siū Nazi chiàm-niá liáu, i cháu-khì Bi-kok, chham-ka Chū-iû
Franse Khong-kun, it-ti̍t kàu 1944-nî 7-goe̍h 31-ji̍t, i ùi Pak-Afrika
chhut-hoat chip-hêng jīm-bū sit-chong. Kàu boeh 60 nî áu, iā tō-sī 2004-nî 4-goe̍h, i ê hui-hêng-ki
chhùi-phìⁿ tī Marseille lâm-pêng hái-bīn pī hoat-hiān, chiah toàn-tēng i ê
sí-bông. I siōng chhut-miâ ê sió-soat sī Sió Ông-chú (Le Petit Prince),
chhut-pán tī 1943-nî, í-keng hoan-e̍k chò chhiau-kòe 160 chióng gí-giân. Tī i
kòe-sin 50 nî ê sî, Franse kā i ê siòng-phìⁿ kah Sió Ông-chú ê tô͘-iūⁿ ìn tī 50-franc ê phió-á
téng-bīn.
--
Antoine DE SAINT-EXUPÉRY /aⁿ-toan de seⁿ-tek-zuperi/ (1900-1944), 是 Franse (法國) 人, 世界有名 ê 飛行家 kah 作家. 伊出世 tī Lyon, 12 歲第一擺坐飛行機, choǎn 對飛行機 ê 趣味無停. 21-23 歲做兵了, 伊服務 tī 航空郵便, 飛行 Europa kah 南 Amerika 中間 ê 航線. 後來, 伊轉 Franse 做試飛員, 直到 2 次世界大戰. 1939-1940 伊 koh 加入軍隊, 擔任飛行員.
Tī Franse 受 Nazi 佔領了, 伊走去美國, 參加自由 Franse 空軍, 一直到 1944 年 7 月 31 日, 伊 ùi 北 Afrika 出發執行任務失蹤. 到欲 60 年後, 亦就是 2004 年 4 月, 伊 ê 飛行機碎片 tī Marseille 南爿海面被發現, 才斷定伊 ê 死亡. 伊上出名 ê 小說 sī 小王子 (Le Petit Prince), 出版 tī 1943 年, 已經翻譯做超過 160 種語言. Tī 伊過身 50年 ê 時, Franse kā 伊 ê 相片 kah 小王子 ê 圖樣印 tī 50-franc ê 票仔頂面.
Chu-liāu lâi-goân/ 資料來源: wikipedia
No comments:
Post a Comment